Agig tubag sa nagkataas nga mga insidente sa pagmaneho nga hubog, ang Land Transportation Office (LTO) 7 ug ang Cebu City Government mipadayag sa ilang pasalig sa pagpalig-on sa kaluwasan sa kadalanan para sa mga motorista ug mga pedestrian.
Busa, pormal nga gitugyan ni LTO 7 Regional Director Atty. Wendel C. Dinglasan ang duha ka breath analyzers ngadto kang Cebu City Mayor Nestor Archival isip suporta sa gipakusog nga mga inisyatibo sa siyudad sa kaluwasan sa kadalanan ug pagpatuman sa trapiko.
Matod ni Mayor Archival, usa ka yunit ang ipadala sa Cebu City Transportation Office (CCTO), samtang ang usa i-assign sa Traffic Enforcement Unit (TEU) aron mapalambo ang pagmonitor ug pagpalig-on sa pagpatuman batok sa drunk driving.
Dugang pa ni Archival, inubanan sa LTO, iyahang gitinguha nga makabaton na gayud og breath analyzer aron hingpit nang masuwayan o ma-test na ang mga drayber nga adunay impluwensya sa ilimnong makahubog.
Matod pa niya, ang pag-drive nga hubog makahatag og risgo sa mga katawhan, hinungdan nga mapasalamaton kini siya sa LTO sa pagtugot sa pagpahuwam sa maong ekipo nga magamit sa kadalanan.
