CEBU CITY- Niawhag ang kadagkoan sa Simbahang Romano Katoliko sa Sugbo sa mga matuuhon nga magiyahan sa mga pagtulon-an sa 2024 ug magkupot sa paglaom samtang mapasalamaton ang kasingkasing sa pagsugat sa bag-ong tuig nga 2025.
Sa pagsugod sa bag-ong tuig, ang mensahe ni Cebu Archbishop Jose S. Palma, nakasentro sa pamalandong nga nagkuha og inspirasyon sa mga Mago gikan sa Sidlakan o Wise Men from the East.
Kung diin, gihatagan ug gibugaton sa Arsobispo nga sama kanila, hinaut nga kita mosalig sa mga timailhan sa Dios, makaila sa Iyang giya, ug molahutay sa mga pagsulay samtang atong gitinguha ang pinakalawom nga mga tinguha sa atong mga kasingkasing.
Gidugang pa niini, nga atong buhaton nga sumbanan kining mga Malaomong Magpapanaw nga gikan sa Sidlakan sa atong pag-abli ug pagsugod sa bag-ong tuig.
Kung diin, atong sundon ang ilang pagkamasaligon sa mga timaan nga gihatag kanila; ang ilang pagkamaantigo mosabot sa mga instrumento sa Diyos nga nagiya kanila paingon Kaniya; ug ang ilang pagkamakanunayon taliwala sa kalisod ug pagsulay aron makab-ot ug mahimamat ang gimithi sa ilang mga kasingkasing.
