CEBU CITY-Dakong kahibulungan ug kakurat ang nabati karon ni Cebu Auxiliary Bishop Midyphil Billones sa dihang siya ang gitudlo sa Santo Papa nga maoy moduma sa Archdiocese Of Jaro sa Iloilo.
Mao kini ang gipaambit ni Most Rev. Midyphil Billones atol sa pakighinabi sa Bombo Radyo Cebu nga hilabihan kini nga nakurat apan, tungod kay lakip kini sa dagan sa kinabuhi sa usa ka pari ingon man nga gisurrender na niini ngadto sa Ginoo ang unsa man ang gihatag nga mission ngadto kaniya.
Gawas usab nga na-surprise kini kay adunay kalinaw sa kasingkasing ang iyang gibati sa pagpabalik kaniya sa local church of Jaro.
Ingon man nga mipadayag kini og pasalamat sa mga Sugboanon nga misalig kaniya sa pagsabwag sa mga pulong sa Ginoo.
Isip ika-14 nga arsobispo sa Jaro, siya ang modumala sa archdiocese, nga naglangkob sa lalawigan ug siyudad sa Iloilo, ingon man sa Guimaras.
Si Billones nagserbisyo sa archdiocese sa lainlaing mga kapasidad, lakip ang personal nga kalihim ni Arsobispo Alberto Piamonte ug ang iyang gipuli nga si Archbishop Angel Lagdameo.
Nagserbisyo usab si Billones isip rector sa St. Joseph Regional Seminary sa Jaro sa dihang gitudlo siya ni Pope Francis nga auxiliary bishop sa Sugbo niadtong Hulyo 2019.
