CEBU CITY-Giaprobahan sa Cebu City Council ang 2024 annual budget sa City Government nga mokabat sa P19.9 bilyones alang sa regular fund proper ug P2 bilyones alang sa special accounts.
Subay niini, giaprobahan sa konseho ang budget ordinance nga gimugna nila ni Konsehal Noel Wenceslao ug Jocelyn Pesquera sa kataposang regular nga sesyon sa tuig.
Ang giaprobahan nga budget mas ubos pa sa P100 bilyones nga budget nga gisugyot ni Mayor Michael Rama.
Kon diin, ang pinakadako nga pagkunhod gihimo sa gisugyot nga Comprehensive Climate Change Adaptation and Mitigation Projects ubos sa Office of the Mayor.
Gikan sa gisugyot nga P50 bilyones nga budget, P600 milyones lang ang naaprobahan sa konseho.
Dugang niini, ang proposed maintenance and other operating expenditures (MOOE) nahiagom usab sa pagkunhod gikan sa P18.3 bilyones ngadto na lang sa P5.4 bilyones.
Samtang, ang gisugyot nga personnel services ug subsidy nagpabiling wala matandog sa P2.5 bilyones ug P900.6 milyones, matag usa.
