CEBU CITY-Gipahimangnoan sa Cebu City Fire Station ang publiko nga magbinantayon ug doble nga mag-amping arun sa paglikay sa mga motumaw o makamugna og sunog gumikan nagnihit na ang supply sa tubig sa dakbayan sa Sugbo.
Mao kini ang gihangyo ni SFO2 Wendell Villanueva, ang tigpamaba sa Cebu City Fire Station diin sama sa miaging adlaw nga anaa sa lima ka grassfire ang ilang narespondihan hinungdan nga hugot nilang gi-awhag ang katawhan nga makig-kooperate ilabi na, nga ang maong insidente mamahimo ra nga likayan sama sa paglikay sa pagdaob sa ilang mga tugkaran ug uban pa.
Mihangyo usab si Villanueva sa mga barangay officials nga mohimo og pagpasabot sa ilang mga gisakupan kabahin sa mga pagdaob, paglabay og upos sa sigarilyo nga dili magpataka og labay gumikan mamahimo kining hinungdan sa sunog.
Gani, gihimug-atan niini nga ang pagkawala’y pakabana sa palibot, makahatag og kakulba, ingon man trauma sa mga tawo gumikan sa kinatibuk-ang resulta sa mga lihok nga makamugna og sunog.
