Gimandoan ni Cebu City Mayor Nestor Archival ang tanang barangay nga ilhon dayon ang posibleng mga relocation site sulod sa ilang mga hurisdiksyon samtang ang Dakbayan nagdali sa pagbalhin sa mga pamilya nga nagpabilin pa sa mga classroom ug temporaryong mga puy-anan pipila ka semana human sa bagyong Tino.
Sa gipagawas nga direktiba ni Archival atol sa usa ka espesyal nga miting sa Cebu City Development Council niadtong Nobyembre 19, 2025, kauban nga mga kapitan sa barangay, mga pangu sa departamento ug mga representante gikan sa Department of Public Works and Highways (DPWH) aron hisgutan ang nagpadayon nga mga kabalaka sa rehabilitasyon.
Ingon man nga ang padayon nga paggamit sa mga eskwelahan isip mga evacuation site usa ka dakong kabalaka nga gipatungha, diin nag-aghat sa mga magtutudlo sa pag-apelar nga limpyohan ang mga classroom sa labing dali nga panahon.
Gipaambit usab sa mayor ang usa sa mga hagit nga ilang giatubang karon ang pagpangita og lugar, busa nihangyo kini nga tabangan ang City Government sa kung kinsa ang adunay bakante nga lugar nga mamahimong temporaryong tukuran alang sa mga biktima sa Bagyo kay andam nila kini nga abangan sa syudad.
Gitaho usab ni Acting Vice Mayor Winston Pepito ang usa ka potensyal nga tulo ka ektarya nga lugar sa Barangay San Jose alang sa posible nga relocation ug nipasalig ni Franklyn Ong, Presidente sa Association of Barangay Councils, nga ang mga lider sa barangay andam motabang, nga nag-ingon nga ang ilang papel “kritikal” sa pagpadali sa mga paningkamot sa rehabilitasyon.
Gihisgutan usab sa miting ang pagrepaso sa kapin sa P1.5 bilyon nga kantidad sa dugay nang nalangan nga mga proyekto sa Local Development Fund (LDF), diin ang uban nagsugod pa kaniadtong 2016.
