Nisulpot ang presensya sa Sandiganbayan ang state witness nga si kanhi Department of Public Works and Highways (DPWH) USec. Roberto Bernardo gahapong adlawa, Biyernes, Abril 24.
Mahinumduman nga wala siya makatambong bail hearing ni kanhi Senador Ramon Revilla Jr. ug sa iyang mga kauban nga akusado niadtong unang adlaw, tungod kay nasakit siya, basi sa kumpirmasyon sa resident doctor sa anti-graft court.
Subay niini, sa iyang pag-atubang sa korte gahapong adlawa, si Bernardo nagsul-ob og face mask subay sa mando ni Sandiganbayan Third Division chairperson ug Associate Justice Karl Miranda, diin sa iyang testimonya sa korte, gibutyag ni Bernardo ang giingong tulo ka cash deliveries kang Revilla.
Miingon siya nga personal niyang gihatud ang unang unom (6) ka kahon ug usa ka paper bag nga adunay sulod nga P125 milyon niadtong Disyembre 2024, ug giingong giubanan siya sa iyang drayber, si Isko Dela Fuente.
Samtang niadtong Pebrero 2025, ang iyang aide nga si Niño Garcia, nakahatud usab og 13 ka kahon nga nagkantidad og P250 milyon.
Ingun man nga ang ikatulong paghatud sa kwarta, matod niya, nahitabo niadtong Marso sa miaging tuig, diin siya mismo ang naghatud og dugang nga P125 milyon nga sulod sa unom (6) ka kahon.
