Gi-anunsyo ni Interior Secretary Jonvic Remulla niadtong Lunes sa gabii nga usa na ka person deprived of liberty (PDL) ang kanhi House Speaker nga si Martin Romualdez human gi-silbi ang warrant of arrest batok kaniya sulod sa Cardinal Santos Medical Center.
Sumala ni Remulla, gi-basahan si Romualdez sa iyang mga katungod atubangan sa iyang pamilya, mga abogado, ug mga doktor samtang nag-antus kini sa cardiovascular event, unstable nga pressure sa dugo, ug anxiety attack.
Tungod niini, adunay gi-pwesto nga mga armadong guwardiya ug pulis sulod ug gawas sa ospital aron pagbantay kaniya.
Ang maong arrest warrant gi-luwat sa Sandiganbayan Third Division human siya gipasakaan og kasong plunder kalabot sa P7.4 bilyon nga gidudahang kickback scheme ug anomalous budget insertions sa mga flood control projects, diin si kanhi Ako Bicol Rep. Zaldy Co ug uban pa nga nalambigit gi-isyuhan usab og warrant of arrest ug hold departure orders.
Tungod sa iyang kondisyon, ang kampo ni Romualdez nagsang-at og urgent motion sa Sandiganbayan aron tugotan siya nga magpabilin sa ospital kutob sa gikinahanglan sa medikal nga paagi.
Gi-klaro sa iyang mga dokumento nga si Romualdez adunay mga sakit sa kasingkasing sama sa Coronary Artery Disease ug Hypertensive Atherosclerotic Cardiovascular Disease, ug dili pa luwas nga ibalhin sa usa ka detention facility.
Gipasabot sa iyang abogado nga si Ade Fajardo nga wala sila nagpa-espesyal o naglikay sa arresto, kundi naghangyo lang sa patas nga proseso ug pagsunod sa tambag sa doktor.
Apan, gipahibalo ni Sec. Remulla nga susihon sa mga doktor sa DILG ug PNP ang kondisyon ni Romualdez kada adlaw aron mahibal-an kung kanus-a siya mapresentar sa korte.
Gipasalig sa kalihim nga walay diskriminasyon ubos sa balaod ug dili kini permanente nga sitwasyon tungod kay sa higayon nga hatagan siya sa doktor og green light, si Romualdez ibalhin dayon sa prisohan sa Payatas.
Ang kaso, nga gidumala sa Sandiganbayan Third Division ubos ni Associate Justice Karl Miranda, naggikan sa kontrobersyal nga”ghost” infrastructure projects nga kaniadto gibutyag ni Presidente Ferdinand Marcos Jr. sa iyang State of the Nation Address.
