CEBU CITY-Gihangop ni Cebu City Mayor Raymond Alvin Garcia ang hagit nga kaso ni Cebu City Mayoral Aspirant Yogi Filemon Ruiz kansang kanhi Customs Commissioner nga nipahibawo sa kahilwas sa mga debris nga gibiyaan sa Osmeña Boulevard isip kabahin sa Cebu Bus Rapid Transit (BRT) project.
Matod sa Mayor nga andam siya nga sulbaron ang isyu kung adunay merito ang reklamo ug gipasalig sa publiko nga masulbad ang bisan unsang lehitimong kabalaka.
Dugang sa Mayor nga wala pa siya makadawat sa pormal nga reklamo ug nagdumili usa siya sa paghatag og dugang pa nga komento hangtod nga ang opisyal nga reklamo maabot sa iyang atensyon.
Ingon man nga gimanduan na niini si Engr. Norvin Imbong, ang project manager sa Cebu Bus Rapid Transit (CBRT), ug ang Department of Transportation (DOTr) sa pag-imbestigar sa mga reklamo kalabot sa safety hazards nga dala sa lamppost materials ug debris sa Osmeña Boulevard ning dakbayan sa Sugbo.
Matod ni Garcia nga padayon pa nga gitrabaho sa dakbayan ang pagsulbad sa dugay nang mga isyu ug nangayo og pasensya sa publiko tungod kay bag-o pa ang iyang administrasyon sa pagdumala sa kagamhanang dakbayan.
Kahinumduman nga nisang-at si Ruiz sa reklamo atubangan sa Office of the Ombudsman-Visayas niadtong Oktubre 17, nga nipasangil kang Mayor Garcia og grave misconduct ug serious neglect of duty.
Nanawagan siya karon sa preventive suspension ni Garcia ug gipasakaan siya og kasong kalapasan sa Republic Act 3019 o Anti-Graft and Corrupt Practices Act.
