CEBU CITY-Nipasaka og kasong administratiba sa Office of the President batok kang Cebu Governor Gwendolyn Garcia si Cebu City Mayor Michael Rama tungod sa paglapas sa Administrative Order 23 series of 1992 Section 1.
Matud pa niini nga gilapas ni Garcia ang mga prinsipyo sa pag-abuso sa awtoridad, pagpanglupig, ug sayop nga pamatasan, ingon man nga wala siyay hurisdiksyon nga manghilabot sa mga kalihokan sa dakbayan sa Sugbo ug isip Highly Urbanized City, ang Cebu City naglihok nga buwag sa probinsiya.
Ang maong memorandum nagkanayon nga ang nagpadayong construction nakalusot sa buffer zones sa Cebu Provincial Capitol ug Fuente Osmeña Circle.
Nasayran nga ang naasoy nga kaso naggikan sa pag-isyu ni Garcia og cease-and-desist order, pinaagi sa Memorandum 16-2024 nga nagmando sa Hunan Road and Bridge Construction Group Co. Ltd. nga ipahunong ang pagtukod ug bus station duol sa Provincial Capitol.
Diin ang maong bus station kabahin sa Cebu Bus Rapid Transit project, nga gitukod sa dakbayan sa Sugbo.
Subay niini, sa dihang gipangutana si Gobernador Garcia kabahin sa iyang reaksyon, nagdumili kini sa pagkomento bahin sa maong butang ug “no comment” lamang kini.
