CEBU CITY-Magtagbo sila si Cebu City Mayor Michael Rama ug Transportation Secretary Jaime Bautista karung adlaw nga Biyernes, Abril 19, 2024 arun sulbaron ang mga isyu sa Cebu Bus Rapid Transit (CBRT) ug Cebu Port Authority (CPA).
Mahitabo ang maong panagtigom samtang ang syudad ang mag-host og usa ka panagtapos sa mga national leaders sa PDP-Laban karung semanaha, diin si Rama mao ang bise presidente sa maong partido sa Kabisay-an.
Gipahibalo ni Mayor Rama nga gikompirmar na ni DOTr Secretary Bautista nga maabot kini sa dakbayan sa Sugbo ug makigtagbo alang sa usa ka diskusyon may kalabotan na sa BRT ug CPA.
Matud pa sa mayor nga iyahang tuyo nga masulbad na ang mga isyu nga naglambigit sa duha ka entidad ubos sa DOTr sa dakbayan.
Gitataw ni Rama nga gusto niini nga matapos ang tanang isyu gumikan kay giingong wala kini bisan ka-usa nga nahimong ‘negative player’, inay usa kini ka ‘positive thinker’.
Gani, gilakbitan sa opisyal nga wala niini gi-isip nga kontra si Cebu Provincial Governor Gwendolyn Garcia ug matud pa nga padayon kini nga mobarog alang sa One Cebu Island.
Gitino ni Mayor Rama nga dili kini gusto nga mopatigbabaw ang panagbangi sa Sugbo.
