CEBU CITY-Ipakatap ang mokabat sa 800 ka police personnel sa Cebu City Police Office (CCPO) aron masiguro ang pag-obserbar sa Kalag-Kalag 2023 human sa Barangay ug Sangguniang Kabataan Elections.
Nibutyag si Police Lt. Col. Janette Rafter, Deputy City Director for operations sa CCPO, nga sa pagpaabot sa ikaduhang dakong kalihukan human sa eleksiyon karong Oktubre 30, andam sila nga mopakatap og mga uniformed personnel sa matag dapit aron masiguro ang kalinaw ug kahapsay.
Sa laing bahin, duha ang gideklarar nga holiday, All Saints’ Day ug All Souls’ Day sa Nobyembre 1 ug 2, sunodsunod,nga motugpa usab human sa eleksyon.
Sa pagpaabot niining duha ka mga panghitabo, si Rafter niingon nga ang mga pulis sa dakbayan sa Sugbo gidasig sa paglugway sa ilang mga katungdanan sa seguridad aron masiguro ang kaluwasan sa publiko.
Matod ni Rafter, ang ilahang deployment plan alang sa Nobyembre 1 ug 2 nadesisyonan na ug andam na nga ipatuman.
