Miluwat sa Executive Order (EO) no. 15 si Cebu Provincial Governor Pamela “Pam” Baricuatro nga nagmando sa tanang buhatan sa Kagamhanang Lalawigan sa pagpatuman og fuel-saving measures lakip na ang pagpaminus sa dili gikinahanglan pagbayhe aron sa responsible pagkonsumo sa produktong lana isip pagpangandam sa nagsingabot nga krisis sa lana sa umaabot nga adlaw o semana.
Kini ang gilatid sa gobernadora atol sa gi-convene niini nga emergency meeting sa Kapitolyo kagahapong adlawa sa Lunes, Marso 2 sa mga posibleng epekto sa kalibutanong kadaot sa gubot sa Middle East tali sa US-Israel ug Iran.
Ang kamanduan sa gobernadora kay nag-awhag sa mga buhatan sa Kapitolyo nga musumiter sa ilang fuel conservation plans isip kabahin sa ilang coordinated provincial response.
Ang EO 15 kay naghatag sab og exemptions para sa mga emergency and essential services sama sa mga ambulansya, disaster response operations, ug emergency social services aron sa pagsiguro nga dili mabalda ang paghatod sa kritikal nga hinabang sa publiko.
Sa susamang kamanduan, ang Kapitolyo kay nangandam usab sa contingency support mechanisms sa posibleng pag-uli sa mga Sugboanong Overseas Filipino Workers (OFWs) nga apektado sa kagubot sa rehiyon sa higayong ma-repatriate kini og pagdalit sa ilang mga hinabang.
Padayon ang koordinasyon sa Kapitolyo ngadto na sa mga nasudnong ahensya sa Department of National Defense (DND), Department of Foreign Affairs (DFA), Department of Migrant Workers (DMW) ug uban pang national line agencies aron tukma ang ilang impormasyon ug pagpangandam.
