Subling gitinguha ni Cebu Governor Gwendolyn Garcia sa pagpalapad sa internasyonal nga relasyon sa Sugbo, ning higayuna nagsuhid sa potensyal nga panag-uyon sa panag-igsuonay uban sa Mexico.
Gahapon, Pebrero 26, nakigtagbo si Gov. Gwen kang Mexican Ambassador to the Philippines, Daniel Hernandez Joseph, aron hisgutan ang mga posibilidad sa pagpalambo sa kooperasyon tali sa Sugbo ug usa ka rehiyon sa Mexico.
Matud sa gobernadora nga nanghinaut kini nga ang Probinsya sa Sugbo makahimo usab sa pagsulod sa usa ka sisterhood agreement sa bisan asang rehiyon sa Mexico tungod kay wala pa’y bisan usa ka sisterhood relationship sa probinsya sa Mexico.
Diin ang inisyatiba nagtumong sa pagpalig-on sa economic, cultural, ug tourism partnerships nga makaabli ug bag-ong mga oportunidad alang sa probinsiya.
Ang Sugbo nakatukod na og mga sisterhood agreement uban sa pipila ka internasyonal nga mga probinsiya, diin ang matag usa kay talagsaon nga nakatampo sa pagtubo niini.
Lakip ang Hainan ug Fujian sa China, nga nakapauswag sa pamatigayon, kahimsog, ug turismo nga pagbinayloay.
Ingon man nga nakapasayon usab sa panglawas, cultural collaborations, ug turismo ang pakigrelasyon sa Sugbo sa Saint Petersburg, Russia.
Kini nga mga panag-uban adunay dakong papel sa pagpalig-on sa ekonomiya ug diplomatikong koneksyon sa Sugbo sa internasyonal nga komunidad.
Samtang, mibisita usab kini sa buhatan ni Mayor Raymond Garcia diin ang tuyo niini ang pagbuhi-balik sa sister city nga kasabotan sa siyudad sa Guadalajara sa Mexico ug sa dakbayan sa Sugbo, ug ang kahigayonan sa patigayon ug pagbinuligay tali sa duha ka mga siyudad.
