CEBU CITY- Nakasulod na usab ang usa ka Cebuano Graduate sa Topnotchers list sa gipahigayong February 2025 Criminology Licensure Examination.
Ang gradwado kay si Franz Jury Pacaldo Insao nga gikan sa University of the Visayas (UV) Cebu City Main Campus.
Nakatungtong si Insao sa Rank 3 sa maong eksaminasyon sa iyang rating nga 91.85% diin siya lang ang naghinuusang Sugbuanon ang nakakuha sa maong pasidungog.
Gianunsyo sa Professional Regulations Commission (PRC) ang resulta sa eksaminasyon niadtong Biyernes, Marso 7 diin aduna kiniy natala nga 22,245 ang nakapasar sulod sa 36,768 sa kinatibuk-an nakuha sa maong propesyon nga nagpakita og 60.50% passing rate.
Gipahigayon kini niadtong Pebrero 5 hangtod 7 sa mga nagkadaiyang testing centers sa PRC tibuok nasud lakip na diri sa Sugbo.
