Wala pa gihapon makit-i hangtod karon ang usa ka 26-anyos nga checker human kini mahulog gikan sa usa ka foreign cargo vessel sa kadagatan sa Barangay Pooc, siyudad sa Talisay, niadtong Biyernes sa buntag, Pebrero 20.
Giila ni Petty Officer Second Class Roland Lorenza, commander sa Talisay City Coast Guard, ang biktima nga si John Carel Romano, residente sa Barangay Quiot, Cebu City, ug empleyado sa Webb Fontaine Asia.
Sumala sa inisyal nga imbestigasyon, nisaka unta si Romano sa monkey ladder uban ang iyang surveyor sa dihang kalit nga nidalin-as ang hagdan, hinungdan sa iyang pagkahulog sa dagat.
Dali nga nipahigayon og search and rescue operation ang Talisay City Coast Guard, inabagan sa PCG District 7, nga milungtad og kapin sa usa ka oras apan pakyas sila sa pagpangita sa biktima.
Tungod niini, gipahibalo ni Lorenza nga ipadayon nila ang pagpangita kang Romano ugmang adlawa.
