Andam ang gobyerno sa China nga makigtambayayong sa Pilipinas sa pagsumpo sa mga krimen, particular na sa mga offshore gaming operations.
Gihimo ang maong pamahayag ni Guo Jiakun, ang tigpamaba sa Chinese Foreign Ministry human sa bag-ohay nga pagdakop sa kapin 450 ka indibidwal lakip na ang 137 ka Chinese nationals sa Manila.
Diin gi-raid ang giingong offshore gaming operator nga gidumala sa usa ka Chinese national nga gituohang nalambigit sa scam operations nga nakatutok sa sports betting ug investment fraud.
Gisubli usab sa China ang ilang posisyon sa pag-awhag sa mga Chinese sa gawas sa nasud nga higpit nga sundon ang mga lokal nga balaod ug likayan ang pagkalambigit sa mga ilegal nga kalihokan.
Gidasig usab sa China ang Pilipinas sa hingpit nga pagbungkag sa offshore gambling sa labing dali nga panahon.
Nanawagan ang China sa Pilipinas nga ipatuman ang pagpatuman sa balaod sa patas nga paagi ug pagsiguro sa mga lehitimong katungod ug interes sa mga Chinese national sa PH.
Kahinumdoman nga sa niaging katuigan, padayon nga naghimo og mga lakang ang gobyerno sa Pilipinas aron ma-regulate ang operasyon sa mga POGO dinhi sa nasud hangtod nga hingpit na silang gidili ni Presidente Ferdinand Marcos Jr. sa miaging tuig tungod sa ilang pagkalambigit sa mga krimen sama sa human trafficking ug mga scam diin daghang mga Chinese national ang nasikop ug gatusan ka mga Pilipinong biktima ug ubang mga langyaw ang naluwas.
