CEBU – Wala gihapon magkasinabot sa final valuation ang kagamhanan sa Dakbayan sa Sugbo ug ang kagamhanan sa Probinsiya sa Sugbo sa mga kabtangan nga nalambigit sa 93-1 nga land swap deal sugod sa tunga-tunga sa Septiyembre 2022.
Tungod kay gikinahanglan man sa Commission on Audit (COA) ang valuation sa nalambigit nga lote sa dili pa ang city hall ug ang kapitolyo mahimong legal nga musulod og memorandum of agreement alang sa land swap deal, kini nga paglangay mahimo usab nga magpasabot sa pagkalangan sa socialized sa siyudad.
Sa higayon nga mahuman na ang gi-assess nga kantidad sa propiedad mahimo na magsugod ang ubang mga negosasyon nga nagkonsiderar sa badyet sa syudad.
Matud pa ni Cebu City Vice Mayor Raymond Alvin Garcia, ang emisaryo sa kagamhanan sa dakbayan sa Sugbo nga ang city hall ug ang kapitolyo nagkasabot nga gamiton ang zonal valuation sa Bureau of Internal Revenue (BIR) sa pagdeterminar sa kantidad sa mga kabtangan nga sakop sa provincial ordinance 93-1.
Niabot og P8 bilyones ang kinatibuk-ang computation nga matud pa niya taas kaayo.
Dugang pa sa bise mayor nga aduna nay plano nga i-reassess ang maong mga propyedad gamit ang city assessor’s valuation ug hinaot nga moabot ang kantidad nga mas madawat sa siyudad, ilabi na kay plano sa siyudad nga gamiton ang maong propyedad alang sa socialized housing.
Apan ang anaa nga balor sa asesor kay gipetsahan gihapon niadtong 2004.
