Pormal na nga pasakaan og kaso si Colonel Audie Mongao sa General Court Martial human napamatud-an ang mga taho nga iyang gibawi ang iyang suporta kang Presidente Ferdinand Bongbong Marcos Jr.
Sa usa ka press conference niadtong Lunes, gikumpirmar ni Philippine Army Chief Lieutenant General Antonio Nafarrete nga si Mongao mag-atubang og mga kaso sa paglapas sa Article 63 o Disrespect toward the President, Vice-President, National Assembly ubos sa Articles of War.
Sumala ni Nafarrete, nahuman na ang imbestigasyon sa Training Command ug naporma na ang usa ka panel alang sa husay.
Dugang pa sa heneral nga klaro nga ang aksyon ni Mongao usa ka kakulang sa pagtahod sa Articles of War.
Mahinumduman nga si Mongao gitangtang isip kumander sa Training Support Group human ang iyang giingong pahayag sa pag-withdraw sa suporta alang sa Chief Executive nikatap sa social media.
Si Mongao giisip nga usa ka senior officer nga adunay sobra sa tulo ka dekada nga serbisyo sa Armed Forces.
