Gipasabot ni COMELEC Region 7 Regional Director Atty. Francisco Pobe ang proseso sa pagtino sa petsa sa eleksyon, mga deklarasyon sa holiday, ug ang mga lagda sa pagboto sa umaabot nga eleksyon.
Gipahayag ni Atty. Pobe nga ang pagtakda sa eksaktong petsa sa eleksyon, sama sa giingong probisyon bahin sa Nobyembre 2, ubos sa kaalam sa Kongreso.
Dugang niya, ang Kongreso ra ang makamando ug makapasar sa maong balaod. Samtang, alang sa ordinaryong mga lungsuranon ug sa komunidad, nasayran na nga ang Nobyembre 2, kasagaran kabahin sa pagsaulog sa Kalag-kalag, apan tungod kay kini usa na ka balaod, wala nay mahimo ang tanan gawas sa pagtuman ug pagsunod niini.
Dugang ni Pobe nga usa sa mga isyu nga gipataas o gipasagdan mao ang isyu sa patas nga pagboto o kung kini ba patas alang sa mga residente.
Giklaro niya nga dili tanang tawong mopauli o naa sa usa ka dapit sa Nobiyembre 2 gikan sa ilang trabahoan kay rehistradong botante didto. Ang uban niini kay mopauli ra gyud aron mobisita, samtang sa ubang dapit sila rehistrado ug didto gayud sila kinahanglang mobotar.
Tungod niini, gipahayag sa COMELEC-7 nga ang ilang gihangyo sa Commission on Elections mao ang pagdeklara og holiday sugod sa Adlaw sa Piniliay hangtod sa mosunod nga adlaw. Nagtumong kini sa paghatag og higayon ug igong panahon sa mga tawo nga makabalik sa ilang matag working stations o dapit nga gipagtrabahoan human sa pagbotar.
Gipahinumdoman man usab ni Pobe nga usa ra ka adlaw ang mismong adlaw sa piniliay ug kini awtomatiko ug gimando gayud nga usa ka holiday.
Samtang kabahin usab sa mga sakop sa tigbalita, election workers, ug mga frontliners nga magsilbi ug mag-cover sa adlaw sa piniliay, gipasabot ni Atty. Pobe nga walay absentee voting nga gitugot alang sa barangay o lokal nga piniliay tungod kay kini localized man kaayo ug gidesinyo lamang alang sa nasyonal nga mga kandidato.
Apan gipasalig niya nga ang mga media ug uban pang mga election participants gihatagan og prioridad sa pagbotar. Gitambagan niya ang mga sakop sa media nga makig-alayon o mosulti sa mga sakop sa Electoral Board sa ilang polling center nga sila magsilbi o mag-report sa balita aron ma-priority sila ug makabotar og sayo kung diin sila rehistrado sa dili pa mopadayon sa ilang mga buluhaton.
