CEBU CITY- Gihingusgan karon sa Commission on Elections (Comelec) sa lalawigan sa Sugbo ang pagpangandam alang sa Barangay ug SK Elections (BSKE) karong Oktubre 30, 2023.
Aron malikayan ang sunog sa adlaw sa piniliay, susihon ang mga classroom nga magsilbi nga polling station kung aduna ba kini mga fire extinguisher.
Susihon usab sa Comelec ang electrical connections sa voting precincts aron malikayan ang sunog nga mahitabo sa adlaw sa piniliay ilabi na sa grabeng kainit nga nasinati gumikan sa pagsugod sa El Niño niadtong Hulyo 4 nga gideklarar sa state weather bureau Pagasa.
Matud pa ni Omar Sharif Mamalinta, tigpamaba sa Comelec Cebu, nga ang mga safety officer maoy tahasan sa pagpatuman sa safety protocols.
Dugang ni Mamalinta nga ipaubos sa training karong buwana ang mga safety officers aron mahibaw-an nila ang ilang buhaton sa adlaw sa piniliay.
Sa pikas bahin, tutukan usab sa Comelec Central Visayas ang pagbantay sa premature campaigning ug vote buying subay sa nagkaduol na nga Barangay ug Sangguniang Kabataan Elections, kini ang gitino ni Atty. Lionel Marco Castillano.
