CENTRAL VISAYAS – Nakasinati og kapildihan ang CPP-NPA sa Visayas region sanglit gihingusgan sa Visayas Command (VISCOM) ang ilahang hiniusang kakugi sa pagtutok sa ilahang military operations ingon man localized peace engagements isip pakigbatok sa mga teroristang grupo.
Gani na-neutralize ang 25 ka NPA terrorists niini lang bulan sa Hulyo ug adunay 38 ka mga armas ang nakompiskar sa team VISCOM.
Patay ang 8 sa maong ihap atol sa engkwentro niini sa mga operatiba samtang 17 niini ang gi surrender sa kagamhanan.
Dugang pa, nga 22 sa 38 ka armas kay mga high-powered samtang 16 niini kay low-powered.
Kahinumduman nga niadtong Hulyo 16 nipahigayon og operasyon ang mga miyembro sa 42nd Infantry Battalion batok sa CPP-NPA hinungdan nga narekober ang arms cache, nga adunay upat ka M16 rifles; lima ka M14 rifles; usa ka M79 grenade launcher; usa ka shotgun; tulo ka anti-personnel mines; ingon man usab ang pipila ka butang panggubat sa Brgy Boco, Can-avid, Eastern Samar.
Nasundan ang maong operasyon niadtong Hulyo 22 kung diin na-neutralize ang duha ka NPA leaders ug na-rekober ang tulo ka high-powered firearms sa mga sakop sa 4th Scout Ranger Battalion ug 19th Infantry Battalion sa Barangay Cabigajao, Pambuhan, Northern Samar.
Ang pinaka ulahing kapildihan sa teroristang grupo nahitabo sa Western Visayas niadtong nakalabay nga Hulyo 29, kung diin duha ka NPA terrorists ang nadakpan ingon man na kompiskar ang upat ka firearms sa mga miyembro sa 61st Infantry Battalion nunot sa usa ka engkwentro sa usa ka teroristang grupo sa Barangay Ayabang, Leon, Iloilo.
Giawhag ni Lieutenant General Benedict M Arevalo PA, ang Commander sa VISCOM, ang mga nagpabilin sa CPP-NPA sa Visayas nga i-surrender na lang ang ilahang mga armas.
Dugang pa, mipasalig si Arevalo nga mahimong lauman sa mga nagpabiling CPP-NPA nga suportahan ug segurohon niya nga makabaton og malinawon nga kinabuhi kauban ang ilahang tagsa-tagsa ka mga pamilya kung ugaling man nga mu-surrender sila sa kagamhanan.
