Mikabat na sa pito ka mga sakop sa New People’s Army (NPA) ang napatay sa engkwentro tali sa NPA ug 15th Infantry Battalion ug 47th Infantry Battalion, sa Brgy Tapi, Kabankalan City, Negros Occidental adlaw nga Dominggo, Abril 27.
Basi sa impormasyon gikan sa commander sa 302nd Infantry Brigade sa Philippine Army, aduna silay nadawat nga impormasyon bahin sa presensya sa mga armadong grupo sa lugar.
Diin sa taho, upat ka sunodsunod nga engkwentro ang nahitabo nga miresulta sa kamatayon sa tulo ka babaye ug upat ka lalaki.
Gani, positibong giila ang duha sa anak nga si Jose Sellon o nailhan nga ‘kumander kumpol’, ug ang iyang asawa nga si Mary Jane Magquilat, 50-anyos, susamang residente sa Isabela, Negros Occidental.
Matud sa Philippine Army, nga ang mga napatay kay mga nahibilin sa nabungkag nga Southwest Front sa NPA.
Sa pakighinabi sa Bombo Radyo Cebu kang Lieutenant Colonel Israel Galorio, tigpamaba sa Visayas Command, gipahayag usab niini nga nakadawat sila og report gikan sa mga kababayan sa Negros kabahin sa mga teroristang grupo nga nasigpatan sa lugar ug kini nagpamatuod lamang nga dili na sila gusto sa maong mga kalihokan sa grupo.
Daling nagplano ang mga awtoridad aron i-neutralize ang mga armadong grupo.
Dugang pa niya nga nagtuo usab ang opisyal nga ang hinungdan nga aktibo karon ang mga teroristang grupo tungod kay nagplano sila nga magpahigayon og mga extortion activities sa rehiyon.
