Suportado sa Cebu Police Provincial Office (CPPO) ang sugyot nga Anti-Public Intoxication Act ni Secretary Jonvic Remulla sa Department of Interior and Local Government (DILG).
Sa pamahayag pa ni Police Maj. Sam Dacullo, ang Acting Chief sa CPPO Provincial Community Affairs Development Unit sa pakighinabi niini sa mga sakop sa tigbalita niadtong Martes, Abril 7 nga matod pa strikto nilang iimplementar ang pagbawal sa pag-inom sa mga pampublikong lugar ubos sa ilang hurisdiksyon sa tibuok lalawigan sa Sugbo.
Lakip sab sa ilang ipatuman ang pagbawal sa paghukas-hukas sa mga pampublikong dapit ilabi na sa mga kalalakinhan isip pagtahod sa balaod og buot sa uban mga tawo sa palibot.
Gihisgutan sab sa opisyal ang pagpatuman sa curfew sa mga langas nga videoke ug uban pa sa alas 10 sa kagabhion gawas nalang kung adunay espesyal nga okasyon ug adunay kasikbit nga permiso nga nakuha.
Makigkoordinar sila sa mga local government units (LGUs) sa pagpatuman sa maong balaudnon ingon man sa mga lokal nga ordinansa sa maong lungsod ug dakbayan.
