Miabante na sa Sepak Takraw semi-finals sa Secondary Boys Division ang delegasyon gikan sa Bohol Province nga gilangkoban sa mga magduduwa gikan sa Ambassador Pablo R. Suarez National High School ug Valencia Technical Vocational High School.
Kini human sa ilang init nga panagsaka kaatbang ang Bayawan City Division sa Omod Gymnasium kagahapong adlawa sa Biyernes, Marso 14, 2025.
Sa first set sa unang regulation sa maong duwa, gisugdan sa Bohol Province ang pamuntos diin nakakuha kini og bintaha sa iskor nga 15-9.
Pag-abot sa second set kay namintinar niini ang momentum diin milabaw sa iskor nga 15-7.
Apan sa ikaduhang regulation kay didto na nibalos ang Bayawan City diin nakuha niini ang first set sa iskor nga 15-7.
Hinungdan nga mi-init pagbalik ang Bohol Province ang daling nakabalik sa bintaha nga na extend pa ang duwa sa third set sa iskor nga 15-13.
Apan wala nagpalupig ang Bayawan City nga misirado sa set sa labaw nga 15-12.
Sa final regulation, unang nakuha sa Bohol Province ang labaw sa 11-6 nga iskor apan nigukod dayon ang Bayawan City sa 9-0 run niini nga mitapos sa 15-11 nga iskor.
Apan sa kasagmuyo sa Bayawan City kay pagsulod sa laing set kay gilimpyohan na sa Bohol Province ang duwa diin mihipos kini sa dakong labaw nga adunay 9 points advantage.
Hinungdan nga nakuha na sa Bohol Province ang kadaugan nga maoy opisyal nga muabante para sa semifinals.
