CEBU CITY- Mihunong sa pasada ang daghang drayber sa pampublikong transportasyon sa Dakbayan sa Sugbo tungod sa taas nga presyo sa gasolina, samtang ang uban napugos sa pagbalik sa ilang sakyanan ngadto sa mga operator kay dili na igo ang ilang adlaw-adlaw nga kita.
Matod ni Greg Perez, pangulo sa Cebu chapter sa Pagkakaisa ng mga Samahan ng Tsuper at Opereytor Nationwide o PISTON, halos mahurot na sa gasto sa gasolina ang kinitaan sa mga drayber bisan pa sa pagpaubos sa adlaw-adlaw nga boundary sa pipila ka mga operator.
Nakigkita usab si Cebu City Mayor Nestor Archival sa mga representante sa taxi, modernong jeepney ug tradisyonal nga jeepney aron hisgutan ang posibleng tabang pinansyal alang sa transport sector.
Una niini, miingon ang pipila ka transport groups sa Cebu nga dili igo ang planong fuel subsidy sa gobyerno aron matubag ang padayon nga pagsaka sa presyo sa krudo.
Sa interbyu sa Bombo Radyo Cebu News Team, giingon ni Ellen Maghanoy, chairperson sa El Pardo Transport Cooperative, nga kulang ang gitaho nga P10,500 nga fuel subsidy labi na kay gilauman pang mosaka ang presyo sa petrolyo sa mga umaabot nga semana.
