CEBU CITY – Moabot sa kapin 30 ka mga samad-dinunggaban sa managlahing bahin sa lawas ang naangkon sa 14 anyos nga biktima kinsa nga napalgang patay sulod sa septic tank sa dakbayan sa Danao, Cebu.
Matud ni Dr. Benjamin Lara, ang medico legal officer sa Police Regional Office 7, nga base sa autopsy report adunay 13 ka samad-dinunggaban sa ulo ug liog, 2 sa walang bahin sa kamot, 11 sa walang bahin sa lawas, ug uban pa nga maoy hinungdan sa iyang kamatayon.
Dugang pa ni Dr. Lara nga walay timailhan sa samad-pinusilan sa ulo sa biktima. Giklaro usab niini nga dili mabdos ang 14 anyos nga si Thesa Marie Ygay diin sukwahi kini sa mga pagtuo nga nagsabak ang dalagita sulod na sa tulo ka buwan.
Samtang gipatim-aw usab sa PNP Medico Legal officer nga namatay si Ygay sulod na sa 72 oras gikan sa pagkaugkat sa patay’ng lawas niini sa maong septic tank
Wala usab nakakita si Lara og mga timailhan nga gilugos ang biktima sanglit anaa na man kini sa “state of decomposition”.
Nagtuo usab si Lara nga gigamitan kini og managlahing hinagiban tungod sa gidak-on sa samad-dinunggaban nga naangkon ni Ygay.
Padayon usab ang hotpursuit operation sa kapulisan batok sa suspek nga si Jessie Montes Medequillo, ang security guard nga giingong nanguyab sa biktima.
