CEBU PROVINCE – Subli na nga ilusad ugmang adlawa ang nabantugan nga Dancing Inmates sa Cebu Provincial Detention and Rehabilitation Center (CPDRC).
Gipahibalo ni Cebu Provincial Governor Gwendolyn Garcia nga kini isip kabahin sa nagkaduol nga pag-normal sa sitwasyon human sa mga restriksyon gumikan sa COVID-19 pandemic.
Matud ni Garcia nga panahon na arun nga ibalik ang atraksyon sa CPDRC nga sikat dili lang sa Sugbo inay lukop kalibotan.
Sa pagkakarun, giingong mikabat na lang sa 800 ka mga inmates ang anaa sa naasoy nga jail facility hayan manawat kini ug dugang mga piniriso nga gikan sa mga prisohan sa nagkadaiyang local government units (LGUs) sa probinsiya.
Gitino sa gobernadora nga mudawat ang CPDRC hangtud sa 1,500 ka mga inmates.
Ang Dancing Inmates sa CPDRC kay nahimong inila diin makita ang ilahang mga videos sa YouTube ug uban pang online platform.
Gani, ang maong mga piniriso nga naghatag ug atraksyon sa jail facility kay nahimu-an pa ug salida nga gi-ulohan ug Happy Jail, nga usa ka documentary streaming television series.
