Mipagawas ang Department of Budget and Management (DBM) ug ₱31.93-bilyones alang sa salary adjustments agig pagsunod sa Executive Order No. 64, nga gipirmahan ni Presidente Ferdinand “Bongbong” Marcos Jr. niadtong Agosto 2 , 2024.
Kini nga mando nag-aprobar sa Salary Standardization Law VI (SSL VI), nga naghatag ug usbaw sa sweldo sa tanang sibilyan nga kawani sa gobyerno.
Mikabat sa 257 ka mga departamento ug ahensya sa gobyerno ang nakadawat sa gigahin nga pundo, samtang 58 pa ka mga ahensya ang kasamtangang giproseso.
Ang DBM nagtrabaho aron maseguro nga mapagawas ang tanang pundo sa labing dali nga panahon.
Ang pag-usbaw sa suweldo kay retroactive gikan sa Enero 2024, ug ang mga pangulo sa departamento giawhag sa pag-apod-apod dayon sa mga salary differentials.
Ang mga pundo alang sa salary adjustment gi-release na ngadto sa nagkalain-laing ahensya sa gobyerno, apil na ang Kongreso, Office of the President, Department of Education, ug uban pa.
Subay sa mga paningkamot sa pagpalambo sa transparency, ang DBM naglunsad sa Salary Standardization Law VI (SSL VI) dashboard, nga nagtugot sa publiko sa pagmonitor sa mga pagpagawas sa budget.
Ang dashboard ma-access pinaagi sa opisyal nga website sa DBM bga gitumong sa pagsiguro sa pagkamay-tulubagon ug paghatag ug updated nga impormasyon sa pag-uswag sa mga disbursement sa salary fund.
Ang pagpagawas sa pundo gibase sa pagsumite sa mga ahensya sa salary adjustment computations ug mga kinahanglanon ngadto sa DBM.
