Nisaka ngadto sa upat ang ihap sa nangamatay gumikan sa padayong kusog nga pag-ulan nga maoy hinungdan sa grabeng pagbaha sa South Korea.
Kini human nga duha pa ka tawo ang namatay ug usa ang gikataho nga missing.
Gikan ang mga biktima sa katalagman sa siyudad sa Seosan sa habagatang lalawigan sa Chungcheong ug usa ka tawo ang gikataho nga nawala human maanod sa suba sa Gwangju sa habagatan-kasadpan.
Samtang, liboan ka mga residente, o sa kinatibuk-ang 5,192 ka mga tawo ang gipabakwit, gikan sa 13 ka mga lungsod ug probinsya nga naapektuhan sa baha.
Ang kusog nga pag-ulan ug pagbaha nakadaot usab sa 496 ka mga pampubliko nga kabtangan samtang 276 ka mga pribadong kabtangan ang naguba.
Nabalda usab ang mga ferry service sa pipila ka mga lugar tungod sa kusog nga ulan.
