CEBU CITY-Gipasusi na sa buhatan sa Office of the Building Official ang mga pipila ka mga building sa dakbayan sa Sugbo human nga nangatagak ang mga debris niini tungod sa kakusog sa hangin dala sa bagyong Kristine.
Apil na niini ang 30-ka tuig nga EMSU building nga nahimutang sa Osmena Blvd corner Arlington Pond sa Barangay Sta. Cruz, dakbayan sa Sugbo ug swerte nalang nga walay naangol o naigo sa nangahulog nga mga tinumpag.
Ingon man ang nahulog nga aluminum cladding sa usa sa mga school building ning dakbayan nga anaa daplin sa karsada nga nakahatag og kahadlok sa mga motorista ug mga tawo nga miagi.
Ug maayo na lang kay walay naangol o naigo ang maong cladding.
Sa pakighinabi sa Bombo Radyo Cebu kang Arch. Florante Catalan, ang head sa OBO nga matag tuig mohimo sila og inspeksyon sa mga edipisyo ilabi na niadtong labaw sa 15 ka tuig na nga natukod aron masiguro nga luwas pa kini.
Apan, kasagmuyo nga gipaambit ni Catalan nga wala pa sila’y nadawat nga bisan usa nga tubag.
Hinuon, bisan og walay mga natalang nanagol, ang buhatan sa OBO niisyu gihapon og violations sa naasoy nga mga building tungod kay nakahatag kini og peligro sa publiko.
Samtang, nipagawas og bag-ong anunsyo ang kagamhanan sa dakbayan sa Sugbo nga naglugway sa pagsuspenso sa tanang level sa pampubliko ug pribadong tunghaan sa dakbayan karong adlawa, Oktubre 24, 2024 tungod sa dili maayong panahon nga gipahinabo sa bagyong Kristine.
Kini nga lakang aron masiguro ang kaluwasan sa mga estudyante ug magtutudlo sa padayong kusog nga hangin ug ulan.
Gawas sa Cebu City, kanselado gihapon ang mga silingang siyudad sama sa Mandaue ug Lapu-Lapu City aron masiguro ang kaluwasan sa mga tinun-an ug magtutudlo.
Ingon man nga padayon ang monitoring sa Quick Response Team ug Disaster Risk Reduction Management diin naka-standby ang rescue equipment sama sa Mandaue City Disaster Risk Reduction Management Office alang sa posibleng mga insidente.
Gawas sa rescue equipment, andam usab ang ilang response team sa matag barangay o sa mga lugar nga delikado sa baha o pagdahili sa yuta.
Mao kini ang gipaambit ni Tashuana Villaflor, ang head sa research and planning Division sa Mandaue Cdrrmo diin hugot ang ilang pag-preparar ug pag-monitor sa posibling epekto sa bagyo.
