CEBU – Luwas lang ang kahimtang sa usa ka truck driver ug ang truck boy niini human sa disgrasya nga ilahang nasugatan sa National highway, Barangay Daanglungsod, lungsod sa Oslob, Cebu.
Giila ang driver nga si Jerwin Balasabas, 42 anyus, samtang ang truck boy mao si Alfie Rabao, 32 anyus ug pulus mga taga Maslog, Negros Oriental.
Gisaysay ni Police Corporal Judel Rivera, sa Oslob Police Station, nga natagak sa dagat ang truck nga gimaneho ni Balasabas human kini nga nakatulog samtang nagbyahe.
Matud ni PCpl Rivera nga gikan pa sa dakbayan sa Carcar ang maong delivery truck nga nagkarga ug mga kabilya ug giingung i-deliver pa unta kini sa Dumaguete, agi sa lungsod sa Santander.
Giingung alas 10 pa sa gabii nagbyahe ang duha hinungdan nga hilabihan ang kaduka sa drayber, rasun nga kini nakatulog.
Nabangga sa seawall ang maong truck apan gumikan sa kusug nga impact, nagusbat ang seawall ug nadiritsu kini sa dagat.
Na-damage usab ang usa ka cottage nga giingung tambayan sa mga mananagat sa area.
Nakig-coordinate na usab ang Oslob police sa Philippine Coast Guard arun sa pagsiguru nga wala’y mi-leak sa truck ug malikay sa oil spill.
Nasayran nga adunay fish cage sa area nga gitagakan sa maong truck.
Pasakaan ug kasong reckless imprudence resulting to damage to property ang driver sa maong truck.
