Gilusad sa kagamhanang dakbayan sa Mandaue ang kasaulogan sa Dengue Awareness and Prevention Month karong buwana sa kampanya batok sa makamatay nga sakit sa dengue.
Gipahigayon ang maong kasaulogan sa Mandaue Presidencia kagahapong adlawa sa Lunes, Hunyo 9, 2025 nga gipasiugdahan sa usa ka motorcade nga gisalmotan sa mga representates gikan sa 27 ka mga barangay sa dakbayan.
Gisalmotan ang maong kalihokan nila Mandaue City Mayor Glenn Bercede, Vice Mayor Nerissa Soon-Ruiz, DOH-7 Regional Director Dr. Joshua Brillantes, City Councilors Jen Del Mar, Cynthia Cinco Remedio, Maline Cortes-Zafra, Oscar Del Castillo ug mga kadagkuan sa Mandaue City Health Office.
Sa maong kalihokan, usa ka Ribbon Cutting ang gibuhata sa Dnegue Awareness Booth ingon man sa pagpirmahay sa Commitment Wall sa hiniusang kampanya sa pakigbatok sa dengue.
Gani sa pikas bahin nanawagan si Mayor Bercede sa matag-Mandauehanon sa pakigbatok sa maong sakit pinaagi sa pagpanglimpyo ug pagpuhag sa posibling pinuy-anan sa mga lamok nga maoy carrier sa maong sakit.
Midalit sab og pasidungog ang buhatan sa Department of Health – Central Visayas (DOH-7) sa kagamhanang dakbayan sa Mandaue isip Lowest Cases of Dengue sa mga Highly Urbanized Cities sa rehiyon.
