CENTRAL VISAYAS-Gikaguol sa Department of Education Central Visayas (DepEd) 7 ang nahitabo sa usa ka Grade 8 student sa Canduman National High School sa dakbayan sa Mandaue.
Sa pakighinabi sa Bombo Radyo Cebu kang Dr. Salustiano Jimenez, ang Regional Director sa DepEd 7, gikompirmar niini nga kaganihang buntag nakadawat kini og balita nga nabugtoan na gayud sa kinabuhi ang maong tinun-an.
Matud ni Dr Jimenez nga andam sila nga mohatag sa bisan unsa man nga matang sa suporta ngadto sa nabiyaan nga pamilya gumikan kay giisip usab nila nga mga anak ang matag tinun-an.
Gani, gipahibalo sa opisyal nga hilabihan karun ang gibating kaguol sa principal sa naasoy nga tunghaan, ingon man ang maestra sa maong bata.
Samtang, gipahibalo ni Dr. Jimenez nga gimandoan na niini ang mga kadagkoan sa maong tunghaan ingon man ang School Division Superintendent sa Mandaue City nga imbestigaran ang maong panghitabo arun nga masayran ang hinungdan sa rason sa paglayat sa maong bata.
Gawas pa niini, gidugang sa DepEd official nga ilaha usab ipaubos sa mental health orientation ang mga tinun-an, mga magtutudlo ug uban pa nga nakasaksi sa maong panghitabo diin posibli nga makahatag og trauma kanila.
Gitino ni Jimenez nga sa matag tunghaan adunay Child Protection Unit, ingon man mga guidance counselors nga mahimong makatabang sa mga tinun-an nga adunay gipanghambin nga mga problema.
Apan iyahang giangkon nga lisod sa pagtumbok sa mga tinun-an nga problemado gumikan kay sagad kanila kung lantawon daw sama nga “okay lang” ug walay makitang bisan unsa mang lama sa problema.
