Makigtagbo karong adlawa, Hunyo 25, si Department of Education in Central Visayas (DepEd-7) Regional Director Arturo Bayocot sa mga schools division superintendent ug mga dako-dako sa tunghaan alang sa usa ka management committee meeting aron pagpalig-on sa school safety measures human sa duguong pagpamusil sa usa ka publikong tunghaan sa Tacloban City.
Sumala ni Bayocot, nag-una sa ilang agenda ang pagpasubsob sa mga patakaran alang sa pagpanalipod sa kinabuhi sa mga tinun-an ug mga magtutudlo. Giklaro sa opisyal nga giisip sa mga awtoridad ang nahitabo isip usa ka isolated case, apan gikinahanglan gihapon nga mangandam ang matag tunghaan ug seguraduhing anaa ang mga preventative measures.
Gimandoan usab ni Bayocot ang mga pangulo sa tunghaan nga pakusgan ang values formation programs pinaagi sa seryosong pagtudlo ug pag-monitor sa maayong pamatasan, disiplina, ug karakter sa mga magtutuon sulod sa klasehanan.
Gawas niini, gipaimbestigahan ug gipahugtan usab niya ang pagpatuman sa mga anti-bullying policy aron malikayan ang mga kagubot nga mahimong mosangpot sa biolensya.
Nagkadaiya na usab ang mga lakang sa nagkalain-laing dapit sa rehiyon diin sa Cebu City, diin gipanginkamutan nga madugtong ang school emergency response sa five-minute response policy sa kapolisan samtang sa Mandaue City ug Lapu-Lapu City, gipatuman ang pag-inspeksyon sa mga ganghaan ug pagsusi sa mga bag sa mga mosulod sa tunghaan.
Sa laing bahin, gipahibawo ni Cebu Governor Pamela Baricuatro nga magtigom ang Provincial Peace and Order Council kauban ang mga parent-teacher association alang sa dugang proteksyon sa mga bata, dungan usab sa panawagan ni Bayocot sa mga ginikanan ug sa tibuok komunidad nga magtinabangay tungod kay nagkinahanglan og tibuok kagamhanan ug katilingban ang pag-edukar ug pagpanalipod sa usa ka anak.
