TALISAY CITY, CEBU- Moabot sa 1,900 ka pamilya sa Dakbayan sa Talisay ang nakadawat og pinansyal, pagkaon, ug pang-agrikulturang ayuda atol sa unang hugna sa pagpanghatag nga gipangunahan sa Kagamhanan sa Probinsya sa Sugbo uban sa lokal nga gobyerno sa Talisay.
Pinaagi sa Provincial Social Welfare and Development Office, Provincial Veterinary Office, Provincial Treasurer’s Office, ug Provincial Agriculture Office, matag benepisyaryo nakadawat og ₱10,000 nga ayuda pinansyal ug 10 ka kilo nga bugas ubos sa Bigay Bigas para sa Masa (BBM) Program.
Nag-apod-apod usab ang probinsya og mga semilya, kabaw, kanding, ug mga bakuna batok sa rabies ug kolera aron matabangan ang panginabuhi sa mga residente ug maprotektahan ang ilang mga kahayupan.
Gipangulohan ang kalihokan ni Cebu Governor Pamela Baricuatro, Talisay City Mayor Samsam Gullas, ug mga opisyal sa probinsya ug siyudad.
Matod ni Gobernador Baricuatro, ang serbisyo publiko kinahanglan ipakita pinaagi sa pag-atiman ug pagtabang sa katawhan. Gisubli usab niya ang iyang pasalig nga maabot ang mga komunidad nga labing nanginahanglan sa tibuok Sugbo.
Ang maong pagpanghatag kabahin sa paningkamot sa probinsya aron matabangan ang mga pamilya nga naapektuhan sa kalamidad ug mapalig-on pag-usab ang ilang panginabuhi.
