PROVINCE OF CEBU- Nagpagawas si Cebu Governor Pamela Baricuatro og Executive Order No. 36 nga nagmando sa mas estriktong mga lakang sa pagpugong ug pagkontrol batok sa African Swine Fever (ASF) aron mapanalipdan ang gibanabanang P20 bilyong industriya sa baboy sa probinsya, bisan wala pay kumpirmadong kaso sa sakit sa Cebu.
Gimando sa gobernador ang pagpaaktibo sa ASF Task Force sa tanang component cities ug municipalities, pagpatuman sa mas hugot nga inspeksyon sa mga pantalan ug entry points, mandatoryong farm biosecurity measures, ug padayon nga disease surveillance, ilabina human sa mga ASF outbreak sa Negros Occidental ug ubang bahin sa Visayas.
Matud ni Baricuatro, ang probinsya nagsagop og mga proactive measures aron mapugngan ang pagsulod sa ASF ug mapanalipdan ang food security ug ang panginabuhian sa liboan ka mga hog raisers sa Cebu.
Base sa monitoring nga gihimo sa mga component cities ug municipalities, negatibo ang tanang laboratory results sa ASF, sumala sa Regional Animal Disease Diagnostics Laboratory sa Department of Agriculture ug sa Bureau of Animal Industry.
Ubos sa EO No. 36, gimando ang mas estriktong inspeksyon sa tanang pantalan ug entry points nga adunay koneksyon sa Negros Island, ilabina ang mga adunay direktang ruta gikan sa ASF-affected provinces.
Gidili usab ang pagpasulod sa mga buhing baboy, karne sa baboy, ug giprosesong pork products gikan sa mga apektadong probinsya gawas lamang kon adunay kompleto nga veterinary health certificate, meat inspection certificate, negatibong ASF laboratory test result, ug ubang gikinahanglang regulatory documents.
Gisugo usab ang mga lokal nga kagamhanan sa pagpahigayon og random inspections aron mapugngan ang iligal nga pagpasulod sa mga baboy ug pork products.
Lakip sa direktiba ang 45 ka adlaw nga pagdili sa pag-agi sa mga livestock carrier ug sakyanan nga gikan sa Negros Occidental ug ubang ASF-affected provinces.
Samtang, gimandoan ang Provincial Veterinary Office, kauban ang mga city ug municipal veterinarians ug agriculture officers, nga ipadayon ang regular nga blood sampling, laboratory testing, ug farm inspections aron masayong mahibal-an kon adunay posibleng kaso sa ASF.
Giawhag usab ang mga hog raisers nga palig-onon ang biosecurity pinaagi sa regular nga pag-disinfect sa mga pasilidad ug kagamitan, paglimite sa pagsulod sa dili awtorisadong mga tawo sa umahan, paggamit og footbaths ug protective clothing, paglikay sa swill feeding, ug pagreport dayon sa mga awtoridad kon adunay dili kasagarang pagkamatay sa mga baboy.
