Nanawagan ang Departamento sa Edukasyon sa mga lokal nga kagamhanan sa Pilipinas nga hunongon na ang paggamit sa mga publikong eskwelahan isip evacuation centers sa nasod sa matag higayon nga adunay kalamidad.
Kini ang gihangyo sa DepEd taliwala sa gipaabot nga nagsingabot nga ting-ulan sa mosunod nga mga adlaw.
Gipasabot ni Education Undersecretary Michael Poa nga tataw ang baruganan sa ilang ahensya atol sa tigom sa National Disaster Risk Reduction and Management Council labot niini.
Matod niya, tumong sa ilang hangyo nga maseguro nga dili mabalda ang pagtuon sa mga tinun-an panahon sa ting-ulan.
Kalabot niini, gitumbok usab ni Poa nga ang polisiya nga gipatuman sa DepEd nagtugot sa usa ka LGU sa paggamit sa mga tunghaan isip emergency evacuation centers kon sulod lang sa 15 ka adlaw.
Matod niya nga mahimong moresulta kini sa pagkabalda sa pagkat-on sa mga tinun-an, ilabi na kay ang mga classroom mao ang nag-unang dapit diin magpuyo ang mga bakwit kon adunay kalamidad.
Sa laing bahin, nagpadayon pa ang pagpangandam sa gobyerno alang niini ingon man ang mga hulga nga posibleng mahitabo sa umaabot nga ting-ulan.
