CEBU – Dili makaapekto sa kandidatura ni presidential candidate Bongbong Marcos, Jr. ang dili pagtambong niini sa mga ipahigayon nga debate.
Gibutyag ni Dr Ryan Maboloc, usa ka propesor sa Ateneo De Davao University, nga istratehiya kini sa kampo ni BBM diin mas gipalabi nila ang ubang platforms sa pagpangampanya nga mas masabtan sa mga yanong Pilipino.
Matud pa, sagad sa mga electorate ang dili na muhatag ug pagtagad sa mga lawom nga pangutana nga sagad ibato sa debate gumikan kay ang kamatuoran, mas mutuo na ang mga tawo sa social media, susama na lang sa Facebook ug TikTok, butang nga gisaligan sa kampo ni BBM.
Sigon ni Maboloc, kung basihan ang demography sa mga botante, wala na kini maglantaw pa sa pagbansay-bansay sa mga polisiya, inay dakong impluwensiya ang makuha sa usa ka kandidato diha sa social media.
Kung hisgotan ang ‘intellectual attitude’ sa mga Pilipino, giingong sagad niini kay dili lawom ang pagsabot sa mga ipahigayon nga debate, ug mas dali nga madani sa mga unsa’y gipakatap sa social media.
Nasayran nga miluwat na ug kumpirmasyon ang kampo ni Marcos, Jr. nga dili kini mutambong sa ipahigayon nga mga debate nga gi-organisar sa Commission on Election (Comelec).
