Gisubli ni Defense Secretary Gilberto Teodoro ang kamahinungdanon sa mas lig-on nga nasudnong depensa aron makuha ang respeto sa Pilipinas sa kalibutan.
Ang kalihim mihimo sa pamahayag sa iyang pakigpulong sa American Chamber of Commerce of the Philippines, diin gipasiugda ni Teodoro nga dili paigo ang diplomasya kung walay lig-ong backbone sa depensa sa Pilipinas.
Uban sa tema nga “Safeguarding the Philippines in a Changing Geopolitical Landscape,” gitumong sa panagtapok ang paghiusa sa mga sektor sa depensa ug negosyo alang sa luwas ug lig-ong nasod.
Gihisgutan usab ni Teodoro ang importansya sa Visiting Forces Agreements (VFAs) isip simbolo sa suporta sa soberanya sa Pilipinas, ilabina taliwala sa tensyon sa West Philippine Sea.
Sa pagkakaron, aduna nay Visiting Forces Agreements ang nasod uban sa United States, Australia, ug Japan, samtang ang mga kasabotan uban sa New Zealand, Canada, France, ug United Kingdom ginahuman pa.
