Walay gahom ang Department of Energy (DOE) sa pagsuspenso sa VAT ug Excise tax sa mga produktong petrolyo.
Kini maoy tubag ni Department of Energy (DOE) Officer-in-Charge (OIC) Sharon Garin nunot sa panawagan nga suspensuhon ang buhis sa gasolina.
Matod ni Garin nga dili lang nila masuspenso ang buhis sa mga produktong petrolyo tungod kay gimando kini sa balaod.
Dugang pa nga ang angayang molihok niini mao ang Kongreso kung kinahanglan nga amyendahan o wagtangon ang kasamtangang balaod.
Dunay mga grupo nga nanawagan nga suspensohon ang excise tax ug value-added tax sa mga produktong petrolyo tungod sa gikahadlokang dakong pagsaka sa presyo sa lana tungod sa tensiyon sa Middle East.
Ingon man nga sa habig sa buhatan kay ilang gituki ang posibleng pagsuspenso sa buhis sa petrolyo sa pakigtagbo nila ni Presidente Ferdinand Marcos Jr. ug mga economic managers.
Gitataw sa kanhi magbabalaod nga walay probisyon sa balaod alang sa pagsuspenso sa buhis, ang pagsuspenso lang sa umento sa presyo ang gitugotan.
Gipaambit usab ni Garin nga mokabat sa P300 bilyones ang koleksiyon sa gobyerno gikan sa excise tax ug VAT, nga maoy tinubdan sa pundo sa gobyerno sa pagpatukod og mga school building, karsada, ug uban pang serbisyo sa panglawas.
