Nag-awhag sa publiko ang Department of Health (DOH)-Central Visayas kabahin sa pag-donate og dugo nunot sa padayon nga panginahanglan sa mga blood donor.
Kini nunot sa gikabutyag sa buhatan nga wala na silay kakuhaan og laing suplay nga tinubdan sa dugo gawas lamang niadtong mga kuwalipikadong mo-donate.
Subay niini, ang mga kwalipikado nga donor sa dugo mao ang mga nag-edad 16 hangtod 65 anyos, diin ang nag-edad og 16 hangtod 17 anyos, magkinahanglan sila og pagtugot sa ginikanan o legal nga magbalantay sa pagdonar og dugo.
Samtang, kadtong adunay permanente nga mga tattoo kinahanglan nga maghulat labing menos usa ka tuig una sila maka-donate og dugo.
Nakig-alayon ang DOH sa mga partner sama sa Philippine Red Cross alang sa pagpahigayon sa blood donation drives sa local government unit (LGUs), usab nag-awhag sa publiko sa pagdonar og dugo ilabi na nga 35 ka adlaw lang ang shelf life sa dugo. | Bombo Irene Ardiente
