Gihangop sa Department of Health (DOH) ang interes ni Baguio City Mayor Benjamin Magalong nga imbestigahan ang giingong sayop nga paggamit sa Medical Assistance for Indigents and Financially Incapacitated Patients (MAIFIP) o nailhan usab nga MAIP nunot sa mitumaw nga mga reklamo kalabot sa pag-apod-apod sa pundo.
Gikanayon sa DOH nga si Secretary Ted Herbosa mismo ang nag-ingon nga ang Maintenance and Other Operating Expenses (MOOE) sa mga tambalanan sa DOH ug mga bayranan gikan sa PhilHealth maoy labing maayong paagi sa pagbayad sa mga galastuhan sa ospital.
Ingon man nga pormal nga nangayo si Sec. Ted og bag-ong line item, buwag sa MAIFIP, aron tugotan ang direktang pagbayad gikan sa DOH ngadto sa LGU nga mga ospital nga dili moagi sa mga politiko.
Kalabot niini, gikatakdang imbestigahan sa grupo ni Magalong ang DOH nunot sa mga pasangil sa sayop nga paggamit sa pundo, nga gikatahong gigamit sa politikanhong katuyoan sa niaging piniliay.
