Gipahimangnoan sa Department of Health (DOH) ang publiko nga likayan ang sakit nga hand, foot and mouth disease.
Kini human sa 7% nga pagtaas sa mga kaso sa sakit karong tuiga itandi sa 2024.
Base sa talaan sa DOH niadtong Agosto 9, nisaka ngadto sa 37,368 ang kaso sa sakit sa hand, foot and mouth disease karong tuiga gikan sa 5,081 ka kaso sa samang panahon niadtong 2024.
Katunga sa nataptan sa maong sakit kay mga bata nga nag-edad og usa hangtod tulo ka tuig.
Matod sa DOH, ang hand, foot and mouth disease usa ka makatakod nga sakit nga mahimong makuha pinaagi sa paghikap sa mata, ilong o baba gamit ang mga kamot nga nakahikap sa mga butang nga kontaminado sa virus.
Pipila sa mga sintomas sa maong sakit mao ang hilanat, mga samad sa baba, sakit sa tutunlan ug mga rashes sa mga palad ug mga lapalapa sa tiil.
Kalabot niini, gipahinumdoman sa DOH ang publiko nga kung makasinati sila sa nahisgutang mga sintomas kinahanglan nga magpabilin sila sa balay sulod sa 7 ngadto sa 10 ka adlaw o hangtod mawala ang hilanat ug mouga ang mga samad.
Aron malikayan ang pagkuyanap sa maong sakit ngadto sa mga sakop sa panimalay, gitambagan sa DOH nga ilain ang mga butang sa indibidwal nga nataptan sa maong sakit ug gamiton ang disinfectant sa paglimpyo sa lugar nga gipuy-an sa maong tawo.
