Nipasalig ang Department of Labor and Employment (DOLE) nga ang mga minimum wage earners gawas sa Metro Manila makabenepisyo usab sa usbaw sa suholan.
Matod ni Labor Secretary Bienvenido Laguesma, lima ka Regional Wage and Productivity Boards ang nagsugod na sa proseso alang sa bag-ong usbaw sa suholan: Region 1 (Ilocos), Region 2 (Cagayan Valley), Region 3 (Central Luzon), Region 4A (Calabarzon), ug Region 7 (Central Visayas).
Dugang niini nga subay kini sa mando ni Presidente Ferdinand Marcos Jr. sa paghimo og dinaliang pagrepaso sa regional minimum wage rates sulod sa 60 ka adlaw gikan sa katapusang wage order.
Kahinumduman nga ang wage board sa NCR maoy unang nipagawas sa bag-ong umento karong tuiga, nga giaprobahan niadtong Hunyo 30: diin P50 nga usbaw sa suholan sa 1.2 milyones ka trabahante sa rehiyon ug mo-epektibo kini sa Hulyo 18.
Sa bag-ong usbaw, ang inadlaw nga minimum nga suholan sa NCR mosaka gikan sa P645 ngadto sa P695 alang sa non-agriculture sector, ug gikan sa P608 ngadto sa P658 alang sa agriculture, retail ug service establishments nga adunay 15 o mas minos nga mga empleyado, ug manufacturing firms nga adunay ubos sa 10 ka regular nga trabahante.
Gawas sa gibanabana nga 5 ka milyon nga minimum wage earners, si Laguesma miingon nga gibanabana nga 8 ka milyon nga mga trabahante nga mokita og labaw sa minimum nga suholan ang makabenepisyo usab.
Ang gagmay nga mga negosyo nga dili molapas sa 10 ka mga empleyado ug mga kompanya nga apektado sa mga kalamidad o krisis gitugotan nga makapangayo usa ka exemption sa usbaw. Ang mga rehistrado nga Barangay Micro Business Enterprises wala sab sakop sa minimum wage law.
