Giila na sa Cebu City Police Office ang person of interest sa pagpusil-patay sa usa ka fried chicken vendor sa dalan F. Ramos, Barangay Sta. Cruz, dakbayan sa Sugbo, niadtong Huwebes.
Mao kini ang gipahibalo ni Police Lieutenant Colonel Maria Theresa Macatangay, ang deputy city director for operations sa Cebu City Police Office, nga duha ka posibleng motibo ang gitan-aw sa mga imbestigador, mao ang panagbangi sa pamilya ug posibleng kalambigitan sa ilegal nga drugas.
Kini human nga nasayran sa mga otoridad nga bag-o lang nakagawas sa prisohan ang person of interest human nalambigit sa ilegal nga kalihokan sa drugas.
Dugang pa ni Macatangay nga wala nagmalampuson ang mga pagsuway sa pagkontak sa person of interest pinaagi sa telepono, nga nakapatunghag mga pagduda sa mga imbestigador.
Una niini gipusil-patay si Jade Mark Dungog, 27, taga Tres de Abril, Barangay Labangon, sa duha ka mga lalaking sakay sa motorsiklo samtang nagluto og manok sa iyang stall.
Sa sayo pa, ang amahan ug mga igsuon sa biktima nibutyag nga si Dungog adunay init nga panaglalis sa iyang ka-live-in partner human mahibaw-i nga nakigbayloay kini og text message sa laing lalaki.
Atol sa panaglalis, si Dungog gikatahong gihulga nga patyon, nga gituohan sa iyang pamilya nga posibleng konektado sa pagpamusil.
Sa pikas bahin, ang mga imbestigador sa Abellana Police Station nakakuha og closed circuit television (CCTV) footage gikan sa maong lugar nga ilang gisusi aron mailhan ang mga mamumuno.
Diin ang footage i-enhance sa Regional Cyber Crime Unit 7 aron maklaro ang nawong sa mga mamumuno ug ang plate number sa motorsiklo.
