CEBU CITY — Mokabat sa 26 ang angol samtang lima ang gi-dala sa tambalanan sa dakbayan sa Sugbo sa nahitabong disgrasya sa Sitio Sandayong Brgy. Liki lungsod sa Sogod alas-2:30 sa kaadlawon niadtong Disyembre 2.
Duha ka pasahero-an nga bus ang nalambigit sa maong aksidente. Giila ang driver sa San Sebastian minibus nga si Edgar Atindido, 44-anyos, residente sa Brgy. Dakit dakbayan sa Bogo. Samtang ang driver sa autobus mao si Zeha Sabanal, 32-anyos ug lumad nga taga Mandaue City.
Gibutyag ni P/Staff Sergeant Reymond Bacordo sa Sogod PNP nga ang mini bus nga San Sebastian ni-aksyon ug overtake sa autobus.
Apan nawad-an kini ug kontrol ug aron nga di mahulog sa pangpang, gilikay kini sa driver hinungdan ang autobus maoy nabanggaan niini.
Gumikan sa impak natuwad ang minibus hinungdan adunay 26 ka mga pasahero ang naangol samtang 5 ang gidala sa tambalan dinhi sa dakabayan sa sugbo aron ipa x-ray ug ct-scan.
Kini aron sa pagsiguro kung wala bay bali ang mga biktima.
Giklaro usab ni Bacordo nga walay kritikal sa nahitabong aksidente inay mga gasgas ug bun-og lang.// Luwas ra usab ang mga pasahero sa autobus.
Sa pagkakaron, kasamtangang gi-kustodiya sa Sogod PNP ang driver sa mini bus alang sa pagpaabot kun mupasaka ba ug kaso ang mga biktima.
Hinuon matod pa usab nga aduna nay kasabotan ang duha ka mga driver alang sa pagpaayo sa sakyanan sa autobus nga nabanggaan.
