Namatay ang duha ka Pilipinong marino human giatake ang usa ka Saudi oil tanker sa Strait of Hormuz niadtong Lunes sa gabii.
Gikumpirma sa pormal nga pahayag sa Bahri, ang national shipping company sa Saudi Arabia, nga ang ilang vessel nga SIDR naapil sa usa ka “security incident” samtang nagbiyahe kini sa maong estratehikong passage sa dagat.
Tungod niini, opisyal nilang gipahibalo ang pagkawala sa kinabuhi sa duha ka mga seafarer nga lungsanon sa Pilipinas.
Sumala sa Greek maritime security firm nga Marisks, duha ka oil tanker ang naigo sa wala mailhing mga projectile tali sa Lunes ug Martes. Samtang ang duha ka barko nagkarga og mga duha ka milyon nga baril nga krudo gikan sa Juaymah sa sidlakang baybayon sa Saudi Arabia.
Sa pikas bahin, nagkanayon ang Islamic Revolutionary Guard Corps sa Iran nga nasunog ang duha ka tanker human makabangga og mga mines sa dagat.
Kini nga insidente nahitabo taliwala sa nagkadako nga tensyon ug bag-ong sunod-sunod nga giyera tali sa Estados Unidos ug Iran karong semanaha.
Human sa unom ka bulan nga gubat, nagpadayon ang tensyon diin gi-blockade sa Iran ang Strait of Hormuz samtang nagpatuman usab ang US og counter-blockade sa mga dunggoanan sa Iran.
Ang maong lugar kaniadto libre nga maagian sa mga komersyal nga barko, apan ang mga pag-atake sa mga barko sa maong dapit ang nahimong dahilan sa pagkahunlak sa ceasefire tali sa duha ka nasud niadtong Abril.
