Nagpabilin sa kritikal nga kahimtang ang duha ka tinun-an nga lakip sa dul-an 20 ka estudyante nga nangaangol sa nahitabong pagpamusil sulod sa San Jose National High School niadtong Lunes.
Giila ang mga biktima nga sila si Joan Vinias, usa ka Grade 10 student nga nakabaton og samad-pinusilan sa ulo, ug Nathan Candelario, Grade 9 student nga nasamdan sa tiyan human na pusilan.
Subay sa asoy sa inahan ni Joan nga si Rowena Eracho, naglain na ang paminaw sa iyang anak niadtong buntag sa insidente ug hapit na kini dili moadto sa tunghaan. Apan namugos matod pa kini sa pagsulod hinungdan nga iyang gitugotan, diin pipila ka oras ang nilabay nabalitaan na lang niya ang pagpamusil ug nadatnan ang iyang anak nga naghigda na sa stretcher sa ospital.
Dako ang kaguol karon ni Rowena samtang nagpangutana kon giunsa pagkasulod sa mga menor de edad nga suspetsado nga nagdala og armas, apan nanghinaot gihapon siya sa daling pag-ayo sa iyang anak nga nangandoy nga mag-nurse sa umaabot.
Samtang, anaa usab sa kritikal nga kondisyon si Nathan Candelario diin sumala sa iyang amahan nga si Erwin, naigo ang ilawom sa pusod sa iyang anak. Tulo ka buslot ang gibilin sa tinai sa biktima, hinungdan nga gilaumang madugay pa ang pagkaayo sa maong batan-on.
Sumala sa kapolisan, nag-edad og 14 ug 15 anyos ang mga nalambigit sa pagpamusil ug anaa na karon sa kustodiya sa mga awtoridad ang maong mga suspetsado. Mag-atubang og reklamong murder ug frustrated murder ang 15 anyos nga suspetsado human matudlo nga nasayod kini sa iyang gihimo, samtang padayon ang panawagan sa hustisya sa mga pamilya sa biktima aron mapatubag ang tanang may kalambigitan sa maong krimen.
