Nakatala ang Dakbayan sa Sugbo og 9,000 ka mga bata nga nabakunahan sa unang semana sa Measles-Rubella Supplemental Immunization Activity (MR-SIA), usa ka nagpadayon nga kampanya sa tibuok nasud sa Department of Health (DOH) aron mapanalipdan ang mga bata gikan sa mga sakit nga dali makatakod ug mapugngan sa bakuna.
Apan, adunay 486 ka mga ginikanan ang midumili sa pagpabakuna sa ilang mga anak, matod sa chief of staff ni Mayor Nestor Archival, si Kenneth Siasar, niadtong Lunes, Agosto 17. Kini dakong
gintang sa tumong sa maong kampanya sa ahensya gumikan kay ang syudad nagtumong og 90,000 ka mga bata nga malampusong mabakunahan.
Gipunting ni Siasar nga ang mga pagdumili mga ginikanan sa bakuna alang sa ilahang mga anak kay naggumikan kasagaran tungod sa kakulang sa impormasyon ug sayop nga impormasyon, hinungdan nga padayon nilang giawhag ang mga ginikanan nga pabakunahan ang ilang mga anak.
Subay niini, giawhag usab ni Cebu City Mayor Nestor Archival ang mga ginikanan ug guardian nga pabakunahan ang ilang mga anak nga kwalipikado tungod kay gisuportahan sa siyudad ang Measles-Rubella Supplemental Immunization Activity sa Department of Health.
Ang iyang pamahayag migawas samtang ang Dakbayan sa Sugbo nakatala og dul-an 500 ka mga ginikanan nga midumili sa pagpabakuna sa ilang mga anak, diin hangtod niadtong Agosto 15, adunay kinatibuk-an nga 9,227 ka mga bata ang nabakunahan, nga nagrepresentar sa 10.18% sa kinatibuk-ang 90,604 ka mga bata sa siyudad nga kwalipikado.
Opisyal nga gitawag og “Ligtas Tigdas 2026,” ang aktibong hugna sa kampanya nga molungtad gikan Agosto 10 hangtod Agosto 28, 2026, uban ang mga operasyon sa pag-mop-up nga magpadayon hangtod Septyembre 4, 2026.
